Satua Bali “I Pencor”


Satua bali ring sor punika, dados ida dane anggen mangda alit-alite uning carita satua bali sane sayan warsa sayan punah keajegan dane, ampunan lali ring sumber blog puniki. Suksma sampun ngerahuin blog titiang. Carita punika titiang kapupulang saking sue.

I Penjor
Ada katuturan satua anak muani bajang madan I Pencor. Sujatine ia ngelah adan melah, sakewala anake liu ngadanin I Pencor kerana batisne bawakan aneh agigis utawi pencor. Kacerita jani I Pencor sedek negak bengong di malun umahne. Ditu ia sambila isik-isik makeneh.

“Nguda kene jele nasibe. Lekad di gumine kapilara buka kene. Yen I dewek setata kene pencor batise, sinah lakar tusing ada anak luh maakin. Kengkenang apang bisa ngelah kurnan. Uduh…Dewa ratu suryanin titiang, mangda ilang pencor batis titiange niki!”

Setata keto dogen pangacep I Pencor. Mapinunasan apang seger batisne. Sewai-wai I Pencor ngacep, kanti berag awakne engsap teken padewekan tusing lung madaar. Kacerita kala peteng I Pencor pules di kamarne. Sedek nyeriep jeg ada munyi tan pasira. Kesiab I Pencor pedas madingehang.

“Cening…, kayehang ibane di pancoran tanggun tukade, sinah cening lakar seger!”

Ngenggalang I Pencor bangun medasang madingehang. Buin dingeha ada munyi ngorahang, “Cening… kayehang ibane di pancoran tanggun tukade, sinah cening lakar seger!”

Suba semengan I Pencor suba majalan nuju pancoran di sisin tukade. Kendel pesan kenehne I Pencor buin kejep ia lakar seger suud suba ngelah batis pencor. Sinah ia lakar bagus tur ngidaang ngalih anak luh anggon gagelan. Kacerita nangked suba di pancorane. Ngenggalang I Pencor kayeh. Awakne ngilgilang ngetor ulihan dingin. Suud kayeh jeg prajani batisne I Pencor seger. Jani batisne suba pada, tusing ada pencorne. Tan sipi kendel atine I Pencor, kema mai ia malaib kecag-kecog buka anak cenik. Suba keto I Pencor lantas mulih. Ingan kerasa pajalane, atine bagia tan kadi-kadi. Di kenehne suba marawat sinah bakal liu anake ngon napetang icang seger buka jani.

Sedek majalan nuju mulih, I Pencor mareren di beten punyan kayune. Atine enu merasa bagia. Sambila nyedeg ia makeneh.

“Mara kesep I dewek kayeh, suba seger batise. Prajani ilang pencorne. Yan makeloang kayeh, bisa iraga seger makejang. Bok bisa selem alus, kulit bisa putih kedas, sinah I dewek dadi jelema bagus. Aduh…belog gati dewek dadi manusa. Beh…paling melah lakar buin kema kayeh, apang di dewek dadi jelema paling bagus di desane ene!”

Buin kone malipetan I Pencor nuju ka tukade. Nangked ditu buin ia kayeh di pancorane. Suud kayeh, mara lakar nyaluk baju jeg nyelempoh I Pencor labuh. Mara majujuk dapetanga batisne buin pencor. Kesiab tan kadi I Pencor nepuk unduk buka keto. Paling prajani ningalin batisne buin pencor. Ngenggalang ia majumu kayeh, nanging batisne tileh pencor. Kanti pelung awakne I Pencor nyeselin dewekne. Sedek ngeling saget ada munyi tan paraga.
“Cening…., eda sebetanga unduke jani. Ento ulihan cening kaliwat loba. Suba bakat ane luung, buin nagih ane luungan. Bapa tusing demen teken anak loba. Jani terima suba idup ceninge buka keto, suud masel-selan!”

I Pencor bengong di duur batune. Nyelsel dewek tan paguna. Majalan I Pencor ngamulihang. Semune kadi langite gulem makire ujan. Upah loba payu meselan.

Satu Tanggapan to “Satua Bali “I Pencor””

  1. ika ratna Says:

    suksuma nah,,,,


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: